ಈ ವಾರ ರಾಜ್ಯ ರಾಜಕೀಯದಲ್ಲಿ  ಪ್ರಮುಖವಾಗಿ ಮೂರು ರಾಜಕೀಯ ವಿದ್ಯಮಾನಗಳು ನಡೆದಿವೆ.

ಸಚಿವ ಸತೀಶ್‌ ಜಾರಕಿಹೊಳಿ ಮೇಲೆ ಇ.ಡಿ. ದಾಳಿ: ಪರವಾನಗಿ ಪಡೆಯದೆ ವಿದೇಶದಲ್ಲಿ ಅಕ್ರಮವಾಗಿ ಹಣ ಹೂಡಿಕೆ ಮಾಡಿದ್ದಾರೆ ಎಂದು ಆರೋಪಿಸಿ, ಕಾಂಗ್ರೆಸ್‌ ಪಕ್ಷದ ಪ್ರಭಾವಿ ಸಚಿವ ಸತೀಶ್‌ ಜಾರಕಿಹೊಳಿ ಮೇಲೆ ಜಾರಿ ನಿರ್ದೇಶನಾಲಯ (ಇ.ಡಿ.) ದಾಳಿ ಮಾಡಿದೆ. ಇದರಿಂದಾಗಿ ರಾಜ್ಯ ರಾಜಕೀಯದಲ್ಲಿ ತರಾವರಿ ಬೆಳವಣಿಗೆಗಳು ನಡೆದವು. ಕಾಂಗ್ರೆಸ್‌ ಪಕ್ಷದವರೇ ಯಾರೋ ಇ.ಡಿಗೆ ಎಲ್ಲಾ ದಾಖಲೆಗಳು ನೀಡಿ, ದಾಳಿ ಮಾಡಿಸಿದ್ದಾರೆ ಎಂದು ಸತೀಶ್‌ ಜಾರಕಿಹೊಳಿಯವರು ಆಡಿದ ಮಾತು ಸದ್ದು ಮಾಡಿದೆ.  ಮೊದಲು 2028ರಲ್ಲಿ ನಾನೂ ಸಿಎಂ ಹುದ್ದೆಯ ಪ್ರಬಲ ಆಕಾಂಕ್ಷಿ ಎನ್ನುತ್ತಿದ್ದರು. ದಾಳಿಯಾದ ಮೇಲೆ ವರಸೆ ಬದಲಾಯಿಸಿ, ಡಿಕೆಶಿಯವರು 2028ರಲ್ಲೂ ನಾನೇ ಸಿಎಂ ಆಗುವೆ ಎನ್ನುತ್ತಿದ್ದಾರೆ. ಅವರೇ ಆಗಲಿ. ನನಗಿನ್ನು ವಯಸ್ಸಿದೆ, ಮುಂದೆ ನೋಡೋಣ ಎಂದು ಹೇಳಿದ್ದು ಕಾಂಗ್ರೆಸ್‌ನಲ್ಲಿ ಚರ್ಚೆ ಹುಟ್ಟುಹಾಕಿದೆ.

ಸೌಜನ್ಯ ಪ್ರಕರಣದ ಮರು ತನಿಖೆ:  ಧರ್ಮಸ್ಥಳದ ಸೌಜನ್ಯಳನ್ನು ಕಿಡಿಗೇಡಿಗಳು ರೇಪ್‌ ಮಾಡಿ, ಅವಳನ್ನು ಬರ್ಬರವಾಗಿ ಹತ್ಯೆ ಮಾಡಿ ೧೪ ವರ್ಷವಾಯಿತು. ಬೆಳ್ತಂಗಡಿ ಪೊಲೀಸರು, ಎಸ್‌ಐಟಿ, ಸಿಬಿಐ… ಹೀಗೆ ಎಲ್ಲರೂ ಈ ಪ್ರಕರಣದ ತನಿಖೆ ಮಾಡಿದ್ದಾರೆ. ಆದರೆ, ನಿಜವಾದ ಅಪರಾಧಿಗಳನ್ನು ಪತ್ತೆ ಹಚ್ಚಲು ಎಲ್ಲರೂ ವಿಫಲರಾಗಿದ್ದಾರೆ. ಸೌಜನ್ಯ ತಾಯಿ ಕುಸುಮಾವತಿ ನ್ಯಾಯಕ್ಕಾಗಿ ಸುಪ್ರೀಂ ಕೋರ್ಟ್‌ ಬಾಗಿಲು ತಟ್ಟಿದ್ದರು. ನ್ಯಾಯಾಲಯ ಎಸ್‌ಐಟಿ ರಚಿಸಿ ಮರು ತನಿಖೆ ನಡೆಸುವಂತೆ ಕರ್ನಾಟಕ ಸರ್ಕಾರಕ್ಕೆ ತಾಕೀತು ಮಾಡಿದೆ. ಸರ್ಕಾರ ಎಸ್‌ಐಟಿ ರಚಿಸಿದೆ. ಎಸ್‌ಐಟಿ ತಂಡದ ಇಬ್ಬರು ಸದಸ್ಯರ ಮೇಲೆ ಗಂಭೀರವಾದ ಭ್ರಷ್ಟಾಚಾರದ ಆರೋಪಗಳಿವೆ. ಅವರನ್ನು ಬದಲಾಯಿಸಿ ಎಸ್‌ಐಟಿ ಪುನರ್‌ರಚಿಸಬೇಕೆಂದು  ಸೌಜನ್ಯ ತಾಯಿ ಹಾಗೂ ಹೋರಾಟಗಾರರು ಆಗ್ರಹಿಸಿದ್ದಾರೆ.

ಕೆಪಿಎಸ್‌ಸಿ ಹಗರಣದ ಚಂಡು ಸುಪ್ರೀಂ ಕೋರ್ಟ್‌ ಅಂಗಳಕ್ಕೆ:  ಕೆಪಿಎಸ್‌ಸಿ ಹಗರಣದ ತನಿಖೆ ನಡೆಸಲು ರಾಜ್ಯ ಸರ್ಕಾರ ಎಸ್‌ಐಟಿ ರಚಿಸಿತ್ತು. ಅದು ಕೆಲಸ ಆರಂಭಿಸಿ, ಕೆಲವರನ್ನು ವಶಕ್ಕೆ ಪಡೆದು ವಿಚಾರಣೆಯೂ ನಡೆಸುತ್ತಿತ್ತು. ಸಾಕಷ್ಟು ಸಾಕ್ಷ್ಯಗಳನ್ನೂ ಕಲೆಹಾಕಿತ್ತು. ಈ ಮಧ್ಯೆ ಬಸನಗೌಡ್‌ ಪಾಟೀಲ್‌ ಯತ್ನಾಳ ಸಿಬಿಐ ತನಿಖೆ ಕೋರಿ ಹೈಕೋರ್ಟ್‌ಗೆ ಹೋಗಿದರು. ನ್ಯಾಯಾಲಯ ರಾಜ್ಯ ಸರ್ಕಾರ ರಚಿಸಿದ ಎಸ್‌ಐಟಿ ರದ್ದುಪಡಿಸಿ, ಹೊಸ ಎಸ್‌ಐಟಿ ರಚಿಸಿದೆ. ಜತೆಗೆ ತಂಡದ ಸದಸ್ಯರ ಹೆಸರುಗಳನ್ನೂ ಸೂಚಿಸಿದೆ. ಈ ತೀರ್ಪು ಬಂದ ದಿನವೇ ಸಿಎಂ ಡಿಕೆಶಿಯವರು, ʼತಂಡದಲ್ಲಿ ಯಾರಿರಬೇಕು ಎಂದು ನಿರ್ಧರಿಸುವುದು ಸರ್ಕಾರದ ಕೆಲಸ. ನ್ಯಾಯಾಲಯ ಹೆಸರು ಸೂಚಿಸಿದ್ದು ಸರಿಯಲ್ಲʼ ಎಂದು ಅಸಮಾಧಾನ ವ್ಯಕ್ತಪಡಿಸಿದರು. ಹೈಕೋರ್ಟ್‌ ತೀರ್ಪಿನ ವಿರುದ್ಧ ರಾಜ್ಯ ಸರ್ಕಾರ ಸುಪ್ರೀಂ ಕೋರ್ಟ್‌ನಲ್ಲಿ ವಿಶೇಷ ಮೇಲ್ಮನವಿ ಸಲ್ಲಿಸಿದೆ. ವಿಚಾರಣೆ ಇನ್ನಷ್ಟೇ ನಡೆಯಬೇಕಿದೆ.

ಆಳಂದ ಕ್ಷೇತ್ರದ ಕಾಂಗ್ರೆಸ್‌ ಶಾಸಕ ಬಿ.ಆರ್‌. ಪಾಟೀಲ್‌ ತಮ್ಮದೇ ಸರ್ಕಾರದ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಅವರಿಗೆ ಪಕ್ಷ ಮಂತ್ರಿ ಮಾಡಿಲ್ಲ, ಹಾಗಾಗಿ ಅವರು ಕೋಪದಲ್ಲಿ ಹೀಗೆ ಮಾತಾಡುತ್ತಿದ್ದಾರೆ ಎಂದು ಎನ್ನುವವರಿದ್ದಾರೆ.  ಅವರು ಅಧಿಕಾರದಲ್ಲಿರಲಿ, ಇಲ್ಲದಿರಲಿ ಯಾವಾಗಲೂ ರೈತರ ಪರ ಧ್ವನಿ ಎತ್ತುತ್ತಾರೆ ಎಂದು ಎನ್ನುವವರೂ ಇದ್ದಾರೆ. ಅದೇನೇ ಇರಲಿ, ಅವರ ಈ ದನಿ ರೈತಪರವಾಗಿದೆ. ಅವರ ಆಕ್ರೋಶದಲ್ಲಿ ರೈತರ ಹಾಗೂ ನಾಡಿನ ಹಿತ ಅಡಗಿದೆ.

2023ರ ವಿಧಾನ ಸಭಾ ಚುನಾವಣಾ ಪ್ರಚಾರದಲ್ಲಿ “ಕಾಂಗ್ರೆಸ್‌ ಪಕ್ಷ ಅಧಿಕಾರಕ್ಕೆ ಬಂದರೆ ʻಕರ್ನಾಟಕ ಭೂ ಸುಧಾರಣೆ ಕಾಯ್ದೆʼಗೆ ತಿದ್ದುಪಡಿ ತರುವುದಾಗಿ” ಜನರಿಗೆ ಪಕ್ಷದ ಘಟಾನುಘಟಿ ನಾಯಕರು ಮಾತು ಕೊಟ್ಟಿದ್ದರು. ಪ್ರಣಾಳಿಕೆಯಲ್ಲೂ ಘೋಷಿಸಿದರು. ಇವರ ಮಾತನ್ನು ನಂಬಿ ರೈತರು ಮತ ಹಾಕಿ ಇವರನ್ನು ಅಧಿಕಾರಕ್ಕೆ ತಂದರು. ಆದರೆ, ಅಧಿಕಾರಕ್ಕೆ ಬಂದು ಮೂರು ವರ್ಷವಾಯಿತು. ಈ ಕುರಿತು ಯಾರೂ ಚಕಾರೇ ಎತ್ತುತ್ತಿಲ್ಲ.

ಬಿಡದಿ ಟೌನ್‌ಶಿಪ್‌ಗಾಗಿ ಫಲವತ್ತಾದ ಲಕ್ಷಾಂತರ ಎಕರೆ ಜಮೀನನ್ನು ರೈತರಿಂದ ಕಿತ್ತುಕೊಳ್ಳಲು ಈ ಸರ್ಕಾರ ತುದಿಗಾಲಿನಲ್ಲಿ ನಿಂತಿದೆ.  ತಮ್ಮ ಜಮೀನು ಉಳಿಸಿಕೊಳ್ಳಲು ರೈತರು ಬೀದಿಗೆ ಬಂದು ಹೋರಾಡುತ್ತಿದ್ದಾರೆ. ಆದಾಗ್ಯೂ, ಸರ್ಕಾರ ಸಭೆಗಳ ಮೇಲೆ ಸಭೆಗಳನ್ನು ಮಾಡುತ್ತಿದೆ. ಇದು ಜನತಂತ್ರ ವ್ಯವಸ್ಥೆಯಲ್ಲಿ ಒಂದು ನಾಗರಿಕ ಸರ್ಕಾರ ರೈತರೊಂದಿಗೆ ನಡೆದುಕೊಳ್ಳುವ ರೀತಿಯೇ?

ರಾಜ್ಯದಲ್ಲಿ 1961ರಿಂದ ಕರ್ನಾಟಕ ಭೂ ಸುಧಾರಣಾ ಕಾಯ್ದೆ ಜಾರಿಯಲ್ಲಿದೆ.  ದೇವರಾಜ ಅರಸರು 1974ರಲ್ಲಿ ಈ ಕಾಯ್ದೆಗೆ ತಿದ್ದುಪಡಿ ತಂದು ಸುಮಾರು ಎಂಟು ಲಕ್ಷ ಬಡ ಗೇಣಿದಾರರಿಗೆ ಭೂ ಮಾಲೀಕರನ್ನಾಗಿಸಿದರು. ಸುಮಾರು 30 ಲಕ್ಷ ಎಕರೆ ಜಮೀನು ಬಡವರಿಗೆ ಸಿಗುವಂತೆ ಮಾಡಿದರು. ಜತೆಗೆ ವಾರ್ಷಿಕ 25 ಲಕ್ಷ ರೂಪಾಯಿ ಅಥವಾ ಅದಕ್ಕಿಂತ ಹೆಚ್ಚು ಕೃಷಿಯೇತರ ಮೂಲಗಳಿಂದ ಆದಾಯ ಉಳ್ಳವರಿಗೆ, ಕೃಷಿಕರಲ್ಲದವರಿಗೆ, ಕಂಪನಿಗಳಿಗೆ, ಸಂಸ್ಥೆಗಳಿಗೆ ಜಮೀನು ಖರೀದಿಸದಂತೆ ಬೇಲಿ ಹಾಕಿದರು.

ರೈತಪರವಾಗಿದ್ದ ಈ ಕಾಯ್ದೆಗೆ ಬಿ. ಎಸ್‌. ಯಡಿಯೂರಪ್ಪ 2020ರಲ್ಲಿ ಗುಂಡಿ ತೋಡಿದರು. ಈಗ ರಾಜ್ಯದಲ್ಲಿ ಯಾರಾದರೂ ಜಮೀನು ಖರೀದಿಸಬಹುದು. ದೊಡ್ಡ ದೊಡ್ಡ ಉದ್ಯಮಿಗಳು ಹಾಗೂ ಕಂಪನಿಗಳು ರೈತರಿಗೆ ಪುಡಿಗಾಸು ಕೊಟ್ಟು ರಾಜ್ಯದ ಲಕ್ಷಾಂತರ ಎಕರೆ ಜಮೀನು ದೋಚಿದ್ದಾರೆ.

ಇದನ್ನು ನಮ್ಮ ಸರ್ಕಾರವಾದರೂ ತಡೆಯಬಹುದು ಎಂದು ಬಿ.ಅರ್.‌ ಪಾಟೀಲರ  ನಿರೀಕ್ಷಿಸುವುದೇ  ಕಾಂಗ್ರೆಸ್‌ ಪಕ್ಷದ ಕಣ್ಣು ಕೆಂಪಾಗಿಸಬಹುದು. ನಾವೀಗ ಉದ್ಯಮಿಗಳಿಗಾಗಿಯೇ ಅಧಿಕಾರಿದಲ್ಲಿರುವ ಪ್ರಧಾನಿ ನರೇಂದ್ರ ಮೋದಿಯವರ ಹಾಗೂ ಉದ್ಯಮಿಗಳನ್ನು ತಮ್ಮ ಮನೆಗೆ ರತ್ನಗಂಬಳಿ ಹಾಸಿ ಸ್ವಾಗತಿಸುತ್ತಿರುವ ಡಿ.ಕೆ. ಶಿವಕುಮಾರ್‌ ಅವರ  ಕಾಲದಲ್ಲಿದ್ದೇವೆ.

ತಮ್ಮದೇ ಸರ್ಕಾರ ರಚಿಸಿದ ಎಸ್‌ಐಟಿ ತನಿಖೆ ನಡೆಸುತ್ತಿದ್ದಾಗ (ಸಿದ್ದರಾಮಯ್ಯನವರು ಸೌಜನ್ಯ ಪ್ರಕರಣದ ತನಿಖೆಗಾಗಿ ಎಸ್‌ಐಟಿ ರಚಿಸಿದಾಗ) ಆಗ ಉಪ ಮುಖ್ಯಮಂತ್ರಿಯಾಗಿದ್ದ ಡಿಕೆಶಿ ಸದನದ ಒಳಗೂ ಹೊರಗೂ ವೀರೇಂದ್ರ ಹೆಗ್ಗಡೆ ಪರವಾಗಿ ಬ್ಯಾಟಿಂಗ್‌ ಮಾಡಿದರು. ಆಮೇಲೆ ಆ ಎಸ್‌ಐಟಿ ಬಗ್ಗೆ ಒಂದು ಸುದ್ದಿಯೂ ಬಂದಿಲ್ಲ ಜತೆಗೆ ಒಂದು ವರ್ಷವಾದರೂ ಅದು ಇದುವರೆಗೂ ವರದಿ ಸಲ್ಲಿಸಿಲ್ಲ.

ಈಗ ಅವರೇ ಮುಖ್ಯಮಂತ್ರಿ. ಸುಪ್ರೀಂ ಕೋರ್ಟ್‌ ಆದೇಶದಂತೆ ಎಸ್‌ಐಟಿ ರಚಿಸಿದ್ದಾರೆ.   ರಚಿಸಿದ ತಂಡದಲ್ಲಿ ಭ್ರಷ್ಟಾಚಾರಕ್ಕಾಗಿ ಇಲಾಖೆ ತನಿಖೆ ಎದುರಿಸಿದ ವೆಂಕಟೇಶ್‌ ಪ್ರಸನ್ ಇದ್ದಾರೆ. ಡಿಜಿ ಅಥವಾ ಎಡಿಜಿಪಿ ಶ್ರೇಣಿಯ ಅಧಿಕಾರಿಗಳನ್ನೂ ನೇಮಿಸದೆ ನ್ಯಾಯಾಲಯದ ಆದೇಶವನ್ನು ಗಾಳಿಗೆ ತೂರಿದ್ದಾರೆ ಎಂದು ಆರೋಪಿಸಿ ನೆಟ್ಟಿಗರು, ಸಾಮಾಜಿಕ ಕಾರ್ಯಕರ್ತರು ಹಾಗೂ ಸೌಜನ್ಯ ತಾಯಿ ಕುಸುಮಾವತಿಯೂ ಸಿಎಂ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸುತ್ತಿದ್ದಾರೆ. ʻಕೊಂದವರು ಯಾರುʼ ಆಂದೋಲನ  ಸುಪ್ರೀಂ ಕೋರ್ಟ್‌ಗೆ ಪತ್ರವೂ ಬರೆದಿದೆ.

ಒಂದು ಹುಡುಗಿಯನ್ನು ಹಾಡುಹಗಲೇ ರೇಪ್‌ ಮಾಡಿ, ಕೊಲೆ ಮಾಡಿ ಬಿಸಾಡುತ್ತಾರೆ. 14 ವರ್ಷದಿಂದ ಕೊಂದವರು ಯಾರೆಂದು ಪತ್ತೆಹಚ್ಚಲು ಇದುವರೆಗೂ ಬೆಳ್ತಂಗಡಿ ಪೊಲೀಸರಿಗಾಗಲಿ, ಸಿಬಿಐಗಾಗಲಿ, ಎಸ್‌ಐಟಿಗಾಗಲಿ ಆಗಿಲ್ಲ. ಇದು ನಮ್ಮ ರಾಜ್ಯಕ್ಕೊಂದು ಕಪ್ಪು ಚುಕ್ಕೆ.

ನ್ಯಾಯಾಲಯ ಈಗ ಮತ್ತೊಂದು ಅವಕಾಶ ನೀಡಿದೆ. ಆದರೆ, ಸಿಎಂ ಅವರು ದಕ್ಷ, ಪ್ರಾಮಾಣಿಕ ಅಧಿಕಾರಿಗಳ ಎಸ್‌ಐಟಿ ತಂಡ ರಚಿಸಲು ಎಡವಿದ್ದಾರೆ. ವಿರೋಧ ಎದುರಿಸುತ್ತಿರುವ ಎಸ್‌ಐಟಿ ತಂಡದ ಸದಸ್ಯರು ಅವರಾಗಿಯೇ ತಂಡದಿಂದ ಹೊರಬರುತ್ತಾರೋ ಅಥವಾ ಸಿಎಂ ಅವರು ಬದಲಾವಣೆ ಮಾಡುತ್ತಾರೋ ಎಂಬುದು ಕುತೂಹಲ ಮೂಡಿಸಿದೆ.  ಇದೇ ತಂಡ ತನಿಖೆ ನಡೆಸಿದರೆ ರಾಜ್ಯದಲ್ಲಿ ಸಿಎಂ ಹಾಗೂ ಎಸ್‌ಐಟಿ ವಿರುದ್ಧವೇ ಹೋರಾಟ ಭುಗಿಲೇಳುವ ಸಾಧ್ಯತೆಯಿದೆ. ಈ ವಿಷಯ ಸುಪ್ರೀಂ ಕೋರ್ಟ್‌ ಹಾಗೂ ಕಾಂಗ್ರೆಸ್‌ ಹೈಕಮಾಂಡ್ ಅಂಗಳಕ್ಕೂ ತಲುಪಬಹುದು.

ದೇಶದಲ್ಲಿ ಪ್ರಜಾತಂತ್ರ ಉಳಿಸುವ ಮಹತ್ತರವಾದ ಸ್ಥಾನದಲ್ಲಿ ಕೂತಿರುವ ಗ್ಯಾನೇಶ್‌ ಕುಮಾರ್‌ ಈಗ ಜನತೆಯ ಕಟಕಟೆಯಲ್ಲಿ ಬಂದು ನಿಂತಿದ್ದಾರೆ.  ಅವರು ಚುನಾವಣಾ ಆಯೋಗದ ಮುಖ್ಯ  ಆಯುಕ್ತರಾದ ಮೇಲೆ ಎಸ್‌ಐಆರ್‌ ತಂದು,  ಬಿಜೆಪಿ ವಿರುದ್ಧ ಹಾಕಬಹುದಾದ ಮತಗಳನ್ನು ಯೋಜನಾಬದ್ಧವಾಗಿ ಡಿಲೀಟ್‌ ಮಾಡುತ್ತಿದ್ದಾರೆಂದು ವಿರೋಧ ಪಕ್ಷಗಳು ಆರೋಪಿಸಿವೆ. ಇಬ್ಬರು ಚುನಾವಣಾ ಆಯುಕ್ತರು ಅವರ ವಿರುದ್ಧ ಕೇಂದ್ರ ಸಂಪುಟ ಕಾರ್ಯದರ್ಶಿಗೆ ಪತ್ರ ಬರೆದು ವಿಪಕ್ಷಗಳ ಆರೋಪಗಳಿಗೆ ಬಲ ತುಂಬಿದ್ದಾರೆ.

ಈಗ ಗ್ಯಾನೇಶ್‌ ಕುಮಾರ್‌ ವಿರುದ್ಧ ಕೇಸ್‌ ದಾಖಲಿಸಬೇಕು, ಜೈಲಿಗಟ್ಟಬೇಕು ಎಂಬ ಕೂಗು ನಾಲ್ಕು ದಿಕ್ಕಿನಿಂದಲೂ ಕೇಳಿಬರುತ್ತಿದೆ. ಆದರೆ, ಈಗ ಅದು ಅಸಾಧ್ಯ.  ಮುಖ್ಯ ಚುನಾವಣಾ ಆಯುಕ್ತರು ಆಯೋಗದಲ್ಲಿ ಕೂತು ಏನೇ ತಪ್ಪು ಮಾಡಿದರೂ ಅವರ ವಿರುದ್ಧ ಯಾವುದೇ ಸಿವಿಲ್‌ ಅಥವಾ ಕ್ರಿಮಿನಲ್‌ ಕೇಸ್‌ ದಾಖಲು ಮಾಡದಂತೆ ಕೇಂದ್ರ ಸರ್ಕಾರ `The Chief Election commissioner and Other Election commissioners Act – 2023’ ಜಾರಿಗೆ ತಂದಿದೆ.  ಈ ಕಾಯಿದೆ ಅವರು ನಿವೃತ್ತರಾದ ಮೇಲೂ ಅವರ ವಿರುದ್ಧ ಯಾವುದೇ ಕೇಸ್‌ ಹಾಕದಂತೆ ಅವರಿಗೆ ರಕ್ಷಣೆಯ ಖಾತರಿಪಡಿಸಿದೆ.

ಗ್ಯಾನೇಶ್‌ ಕುಮಾರ್‌ ಅವರಾಗಿ ಅವರೇ ರಾಜೀನಾಮೆ ನೀಡಬೇಕು. ಇಲ್ಲದಿದ್ದರೆ ಅವರನ್ನು ಪದಚ್ಯುತಿಗೊಳಿಸುವುದೂ ಅಷ್ಟು ಸುಲಭವಲ್ಲ.  ಸುಪ್ರೀಂ ಕೋರ್ಟ್‌ನ ಮುಖ್ಯ ನ್ಯಾಯಾಧೀಶರಿಗೆ ಯಾವ ರಕ್ಷಣೆ ಇದೆಯೋ ಇವರಿಗೂ ಅಷ್ಟೇ ರಕ್ಷಣೆಯಿದೆ. ಇವರನ್ನು ತೆಗೆದು ಹಾಕಬೇಕಾದರೆ ಒಂದು, ರಾಜ್ಯಸಭೆ ಹಾಗೂ ಲೋಕಸಭೆಯಲ್ಲಿ ಶೇಕಡಾ 50ರಷ್ಟು ಸದಸ್ಯರ ಒಪ್ಪಿಗೆ ಬೇಕು. ಇಲ್ಲವೇ  ಸದನದಲ್ಲಿ ಹಾಜರಿರುವ ಒಟ್ಟು ಸದಸ್ಯರಲ್ಲಿ 2/3ರಷ್ಟು ಸದಸ್ಯರು ಅವರ ವಿರುದ್ಧ ಮತ ಹಾಕಬೇಕು. ಆಗ ಇವರನ್ನು ರಾಷ್ಟ್ರಪತಿಗಳು ತೆಗೆದು ಹಾಕಬಹುದು.

ಈ ರಕ್ಷಣೆ ಅವರಿಗಿರುವ ಕಾರಣಕ್ಕೆ ಅವರ ಬಗ್ಗೆ ಇಡೀ ದೇಶದಲ್ಲಿ ಬಿಸಿಬಿಸಿ ಚರ್ಚೆ ನಡೆಯುತ್ತಿದ್ದರೂ ಅವರು ಎಸಿ ರೂಮಿನಲ್ಲಿ ಯಾವ ಭಯವಿಲ್ಲದೆ  ಆರಾಮವಾಗಿ ಕೂತಿದ್ದಾರೆ. ಜನರಿಗೆ ಉತ್ತರ ನೀಡುವ ಅವಶ್ಯಕತೆ ಇಲ್ಲವೆಂದು ಭಾವಿಸಿದಂತಿದೆ. ಹಾಗಾಗಿ, ಮಾಧ್ಯಮಗಳ ಮುಂದೆ ಬಂದು ಅವರು ಇದುವರೆಗೂ ಮಾತನಾಡಿಲ್ಲ.

ಪ್ರಜಾತಂತ್ರ ದೇಶದಲ್ಲಿ ಅಂತಿಮವಾಗಿ ಎಲ್ಲರೂ ಜನರಿಗೆ ಉತ್ತರದಾಯಿಗಳಾಗಿಬೇಕು. ಹೀಗೆ ಕೆಲವರಿಗೆ ವಿಶೇಷ ರಿಯಾಯಿತಿ ನೀಡಿದರೆ ಅವರು ಜನತೆಯ ತಲೆಯ ಮೇಲೆ ಕಾಲಿಡಿದೆ ಇರುತ್ತಾರೆಯೇ? ಈ ರೀತಿಯಾಗಿ ಅವರಿಗೆ ವಿಶೇಷವಾದ ರಕ್ಷಾ ಕವಚ ಹೋದಿಸಿದೇಕೆ? ಆಯ್ಕೆ ಸಮಿತಿಯಿಂದ ಸುಪ್ರೀಂ ಕೋರ್ಟ್‌ ನ್ಯಾಯಧೀಶರನ್ನು ಹೊರಗೆ ಹಾಕಿದ್ದು ಯಾರ ಅನುಕೂಲಕ್ಕಾಗಿ? ದೇಶದ ಜನತೆ ಕೇಳುತ್ತಿರುವ ಈ ಪ್ರಶ್ನೆಗಳಿಗೆಲ್ಲ ಪ್ರಧಾನಿ ಮೋದಿಯವರ ಬಳಿ ಉತ್ತರವಿದೆಯೇ?

ಕಳೆದ ಕೆಲ ವರ್ಷಗಳಿಂದ ಕೇಂದ್ರ ಚುನಾವಣಾ ಆಯೋಗ ವಿವಾದಗಳು ಮೆತ್ತಿಕೊಂಡೇ ಬದುಕುತ್ತಿದೆ. ಈಗ ಮತ್ತೆ ವಿವಾದದಿಂದಾಗಿ ಸುದ್ದಿಯಲ್ಲಿದೆ. ಮುಖ್ಯ ಚುನಾವಣಾ ಆಯುಕ್ತ ಗ್ಯಾನೇಶ್‌ ಕುಮಾರ್‌ ವಿರುದ್ಧ ಚುನಾವಣಾ ಆಯುಕ್ತರಾದ ಸುಖಬೀರ್‌ ಸಿಂಗ್‌ ಹಾಗೂ ವಿವೇಕ್‌ ಜೋಷಿ ಅವರು ಕೇಂದ್ರ ಸಂಪುಟ ಕಾರ್ಯದರ್ಶಿ ಟಿ. ವಿ. ಸೋಮನಾಥನ್‌ ಅವರಿಗೆ ಪತ್ರ ಬರೆದ ಬೆಳವಣಿಗೆ ಬೆಳಕಿಗೆ ಬಂದು ಚುನಾವಣಾ ಆಯೋಗ ಹಾಗೂ ಮುಖ್ಯ ಆಯುಕ್ತರನ್ನು ಜನತಾ ಕಟಕಟೆಯಲ್ಲಿ ತಂದು ನಿಲ್ಲಿಸಿದೆ.

ಇಬ್ಬರು ಆಯುಕ್ತರನ್ನು ಕತ್ತಲೆಯಲ್ಲಿಟ್ಟು ಅವರೊಬ್ಬರೇ ಕೆಲ ನಿರ್ಣಯಗಳನ್ನು ಮಾಡುತ್ತಿರುವ ಸುದ್ದಿ ದೇಶದ ಜನರನ್ನು ಅಲ್ಲಾಡಿಸಿದೆ. ಈ ದೇಶದಲ್ಲಿ ಯಾರಿಗೆ ಮತದಾನದ ಹಕ್ಕು ಇರಬೇಕು, ಯಾರಿಗೆ ಇರಬಾರದು ಎಂದು ಕೇಂದ್ರ ಸರ್ಕಾರ ಹಾಗೂ ಚುನಾವಣಾ ಆಯೋಗ ನಿರ್ಧರಿಸುವುದಾದರೆ ಇದನ್ನು ಪ್ರಜಾಪ್ರಭುತ್ವವೆಂದು ಏಕೆ ಕರೆಯಬೇಕು ಎಂದು ಜನರು ಪ್ರಶ್ನಿಸುತ್ತಿದ್ದಾರೆ.

ಚುನಾವಣಾ ಆಯೋಗ ಬಿಜೆಪಿ ಪರವಾಗಿ ಕೆಲಸ ಮಾಡುತ್ತಿದೆ ಎಂದು ವಿರೋಧ ಪಕ್ಷಗಳು ಒಂದೇ ಸಮನೆ ದಾಳಿ ಮಾಡುತ್ತಿವೆ. ಮುಖ್ಯ ಚುನಾವಣಾ ಆಯುಕ್ತರು ೪೮ ಗಂಟೆಯಲ್ಲಿ ರಾಜೀನಾಮೆ ನೀಡದಿದ್ದರೆ ಅವರ ವಿರುದ್ಧ  ಆಂದೋಲನ ಮಾಡುತ್ತೇವೆ ಎಂದು ಕಾಕ್ರೋಜ್‌ ಜನತಾ ಪಕ್ಷ ಸಾರಿದೆ.

ಆದಾಗ್ಯೂ ಚುನಾವಣಾ ಆಯೋಗ ಮಾಧ್ಯಮಗಳ ಮುಂದೆ ಬಂದು ʻಇಂಡಿಯನ್‌ ಎಕ್ಸ್‌ಪ್ರೆಸ್‌ ಪತ್ರಿಕೆಯ ಸುದ್ದಿ ಸುಳ್ಳು ಸುದ್ದಿ ಎಂದು ಇದುವರೆಗೂ ಖಂಡಿಸಿಲ್ಲ. ಜನರ ಪ್ರಶ್ನೆಗಳಿಗೆ ಉತ್ತರವೂ ನೀಡುತ್ತಿಲ್ಲ.  ಅನಾಮಧೇಯ ಅಧಿಕಾರಿಯಿಂದ ಒಂದು ಪ್ರೆಸ್‌ ನೋಟ್‌ ಹೊರಡಿಸಿ ಮೌನಕ್ಕೆ ಜಾರಿದೆ. ಆ ಪತ್ರದಲ್ಲೂ ಸುದ್ದಿಯನ್ನು ಖಂಡಿಸಿಲ್ಲ. ಆಯೋಗದ ಈ ನಿಗೂಢ ಮೌನ ಜನರ ಅನುಮಾನ ಮತ್ತಷ್ಟು ಹೆಚ್ಚಿಸಿದೆ